প্ৰকাশিত তাৰিখঃ ৩১ মাৰ্চ, ২০২৫
চানডুবি নিউজ ৰিপ’ৰ্ট –
দক্ষিণ কামৰূপৰ ৰাভা হাছং স্বায়ত্তশাসিত পৰিষদীয় এলেকাৰ জঙাগুৰী পাহাৰত অৱস্থিত শ্ৰীশ্ৰীৰামচন্দ্ৰ জঙাগুৰী বনাশ্ৰমত ২৯ মাৰ্চৰ পৰা ৭ এপ্ৰিললৈ নদিনীয়া কাৰ্যসূচীৰে আৰম্ভ হৈছে ৰামনৱমী অখণ্ড ৰামায়ণ পাঠ। সেই অনুসৰি উক্ত দিনৰ পুৱা নাগাবাবা শ্ৰীচৰণত পূজা–অৰ্চনা অৰ্পণৰ পিচত নদিনীয়া অখণ্ড ৰামায়ণ পাঠ আৰম্ভ হয়।
উল্লেখ্য যে বৰদুৱাৰ চাহ বাগিচাৰ সোঁ মাজৰ শ্ৰীশ্ৰীৰামচন্দ্ৰ জঙাগুৰী বনাশ্ৰম মধ্যপ্ৰদেশৰ জব্বলপুৰৰ নাগা বাবা শ্ৰীশ্ৰীবীৰেন্দ্ৰপুৰী মহাৰাজৰ তপভূমি আছিল। ১৯৫৪ চনত স্থাপন কৰা বনাশ্ৰমখনত ১৯৭৬ চনৰ পৰা আৰম্ভ কৰা হৈছিল ‘অখণ্ড ৰামায়ণ পাঠ’ অনুষ্ঠানৰ। সেই দিনধৰি প্ৰতিটো বৰ্ষৰ চ’ত মাহৰ শুক্লা প্ৰতিপদৰ পৰা নৱমীলৈকে অখণ্ড ৰামায়ণ পাঠ অনুষ্ঠানৰ আয়োজন চলি আহিছে।
এই অনুষ্ঠানত বনাশ্ৰমখনৰ প্ৰতিষ্ঠাতা বীৰেন্দ্ৰপুৰীৰ জন্ম ভূমি জব্বলপুৰৰ বহু ভক্তই অংশ গ্ৰহণ কৰে।
উক্ত অনুষ্ঠানত বিভিন্ন জাতি–ধৰ্ম–বৰ্ণ নিৰ্বিশেষে যোগদান কৰাৰ বাবে গোবিন্দ ৰাভা, আদিত্য ৰাভা, নৰ্মেশ্বৰ ৰাভা, গজেন চন্দ্ৰ ৰাভা, হেমন্ত বড়ো, তৰুণ চন্দ্ৰ মেধি, আদিত্য নাগ, দিলীপ ৰাভা, নিৰঞ্জন ৰাভা আদিকৰি পৰিচালনা সমিতিৰ বিষয়ববীয়াসকলে সমূহ ৰাইজৰ প্ৰতি আহ্বান জনাইছে।
শিৰোনামৰ ফটোঃ চানডুবি নিউজ
