প্ৰকাশিত তাৰিখঃ ৩১ মাৰ্চ, ২০২৫
চানডুবি নিউজ ৰিপ’ৰ্ট –
দক্ষিণ কামৰূপৰ ৰাভা হাছং স্বায়ত্তশাসিত পৰিষদীয় এলেকাৰ বাগান শান্তিপুৰ ৰাইজ গয়ৰহৰ সোণালী জয়ন্তী ২৮ মাৰ্চৰ পৰা দুদিনীয়া কাৰ্যসূচীৰে উদযাপন কৰা হয়।
<< সোণালী জয়ন্তীৰ সম্পূৰ্ণ ভিডিঅটো চাওক >>
সোণালী জয়ন্তীৰ প্ৰথম দিনটোৰ কাৰ্যসূচীত উদযাপন সমিতিৰ সম্পাদক ৰবিন শালৈয়ে গাঁওখন প্ৰতিষ্ঠাৰ চমু ইতিহাস এইদৰে ব্যক্ত কৰে– বাগান শান্তিপুৰ ৰাইজ গয়ৰহ ২নং বাগান ৰাজহ গাঁৱত প্ৰতিষ্ঠা হৈছে। আমাৰ পূৰ্বৰ গাঁও শিঙিমাৰী ব্ৰহ্মপুত্ৰ নদীৰ কাষৰীয়া আছিল। ব্ৰহ্মপুত্ৰৰ প্ৰৱল বান আৰু গৰাখহনীয়াৰ কৱলত এসময় আমাৰ গাঁওখন সম্পূৰ্ণৰূপে নৈৰ বুকুত জাহ গৈছিল। ১৯৬১–৬২ চনত আমাৰ লোক সকলে চুলিকটাত অস্থায়ীভাৱে বসবাস কৰিবলগীয়া হৈছিল। এসময়ত সেই অঞ্চলটোও ব্ৰহ্মপুত্ৰৰ বুকুত বিলীন হৈ গৈছিল। ১৯৭৪ চনৰ ব্ৰহ্মপুত্ৰৰ প্ৰৱল বান আৰু গৰাখহনীয়াৰ ফলত তাৰপৰাও আমি বিদায় ল’বলগীয়া হৈছিল। ১৯৭৪ চনৰ সেই সময়ৰ অসম চৰকাৰৰ মন্ত্ৰী হৰেন্দ্ৰ নাথ তালুকদাৰৰ নেতৃত্বত পলাশবাৰী ৰাজহ চক্ৰৰ বৰদুৱাৰ চাহ বাগিচা কৰ্তৃপক্ষৰ পৰা মাটি অধিগ্ৰহনেৰে উক্ত বৰ্ষৰ ১৭ ফেব্ৰুৱাৰীত এই গাঁওখন প্ৰতিষ্ঠা কৰা হৈছিল। সেই অনুসৰি ২০২৫ চনৰ ১৭ ফেব্ৰুৱাৰীত আমাৰ গাঁওখনে ৫০টা বৰ্ষ অতিক্ৰম কৰিলে।
সোণালী জয়ন্তীৰ কাৰ্যসূচী অনুসৰি– ৭ বজাত গোঁসাইঘৰত বন্তি প্ৰজ্বলন আৰু নাম প্ৰসংগৰে সোণালী জয়ন্তীৰ প্ৰথম কাৰ্যসূচী মুকলি কৰা হয়। তাৰপিছত সোণালী জয়ন্তী উপলক্ষে ৫০খন পতাকা ৫০গৰাকী ব্যক্তিয়ে উত্তোলন কৰে।
গছপুলি ৰোপণ কৰে লোহাৰঘাট বনাঞ্চলিক কাৰ্যালয়ৰ বনবিষয়া নয়নজ্যোতি দাসে।
আদৰণি তোঁৰণ মুকলি কৰে বীৰেণ দাস আৰু ইন্দ্ৰমোহন দাসে। সোণালী জয়ন্তী উদযাপন সমিতিৰ সভাপতি ৰমেন কুমাৰ দাস লগতে উত্তম দাস আৰু প্ৰফুল্ল দাসে স্মৃতি তৰ্পন কৰে।
স্মৃতিচাৰণ গৃহৰ দ্বাৰ মুকলি কৰে সুনতি দাস আৰু পদ্দাবালা দাসে।
দুপৰীয়া সাংস্কৃতিক শোভাযাত্ৰাৰ আনুষ্ঠানিকভাৱে মুকলি কৰে উদযাপন সমিতিৰ সম্পাদক ৰবিন শালৈয়ে। এই শোভাযাত্ৰাত অসমৰ বিভিন্ন জাতি–জনগোষ্ঠীৰ কৃষ্টি–সংস্কৃতি সমূহ প্ৰদৰ্শন কৰা হয়।
আবেলি অনুষ্ঠিত স্মৃতিৰ পানচৈ শীৰ্ষক মতবিনিময় অনুষ্ঠানটোত অতিথি বক্তাৰূপে উপস্থিত থাকে অৱসৰী শিক্ষক ৰামচৰণ কাকতি, নৰেন দাস আৰু উমাকান্ত ৰাভাই।
সোণালী জয়ন্তীৰ স্মৃতিগ্ৰন্থ উন্মোচন কৰে নগাঁৱৰ শ্ৰীমন্ত শংকৰদেৱ বিশ্ববিদ্যালয়ৰ সহযোগী অধ্যাপক ড০ গজেন্দ্ৰ অধিকাৰীয়ে।
এই অনুষ্ঠানত বিশিষ্ট অতিথিৰূপে উপস্থিত থাকে লোক–সংস্কৃতিৰ গৱেষক ভূবিন ৰাভা, অৱসৰী শিক্ষক নিবাৰণ ঠাকুৰীয়া আৰু বিজয় দাস, বিজেপি ৰাজ্যিক কাৰ্যনিৰ্বাহক অনুপ কুমাৰ মেধি, অসম জাতীয় পৰিষদৰ যুটীয়া সম্পাদক পংকজ লোচন গোস্বামী, বিশিষ্ট চিকিৎসক ডাঃ অপূৰ্ব তালুকদাৰ, নিখিল ৰাভা ছাত্ৰ সন্থাৰ কেন্দ্ৰীয় বিষয়ববীয়া দেৱজিৎ নাফা, গৰিয়া মৰিয়া দেশী জাতীয় পৰিষদৰ সাংগঠনিক সম্পাদক আব্দুল হুছেইনে।
শিৰোনামৰ ফটোঃ চানডুবি নিউজ
